الأحد، 10 مارس، 2013

تجربتي مع اليزك بتقنية T-Cat





حبيت اكتب لكم تجربتي لاني بحثت قبل ما اسوي اليزك ومالقيت اجوبه لاسئلتي
فباكتب لكم تجربتي بتفصيل الممل


نبداء بسم الله
اولا كانت عمليتي بمستشفى سليمان الحبيب عند الدكتور علي الكاف

الموعد الاول :
فحص قبل الدخول للدكتور على 4 اجهزة منها قياس للنظر و سمك القرنيه
تكلفة الفحص 525 ريال
الدخول على الدكتور ب 315 ريال ورجع سوى لي فحص ثاني
سالني متى اخر مره لبست عدسات لان لازم قبل العمليه باسبوع ما تلبسين عدسات
الحمد لله كان لي اكثر من شهر ما لبستها وسال اذا اخذ ادويه قلت له لا
وتم تحديد نوع العمليه الي تناسب حالتي انا كان عندي نقص نظر فقط

يوم العمليه:
يعطونك ورقه مكتوب فيها التفاصيل
لازم يكون معك مرافق
دخلت لغرفه صغيره قالو لي شيلي العبايه ولبسوني لبس العمليه كامل بعدين دخلت على غرفة العمليات وبدو الممرضات يقطرون بعيوني قطرة و عصار بلعين وبعد دقايق دخل الدكتور
الدكتور فتح عيني o_o مو كذا اكثر من كذا بكثيرررررررر بس ما احس باي شي لان من ضمن القطرات كان مخدر
كان الدكتور يقول لي على كل خطوة قبل ما يسويها وينبه لي اني اركز على نقطه الضوء الاخضر بجهاز
ويقول لك بتفقدين النور لمدة نص دقيقه وبعدين يرجع و تشمين ريحت حرق شوي وصوت للاجهازة
العين الوحده تاخذ عشر دقايق بس
اثناء العمليه ما تحسين بااااي الم بس تحسين بضغط على العين وانا بصراحه كنت متوتره وخايفه بس لما خلص من العين الاولى وبداء بثانيه ارتحت نفسيا لاني فهمت انه مافيه الم ولا خوف بس شويت تركيز

وبعد العمليه رجعت للغرفه الصغيره ولبست عباتي وعطوني نظارات شمسيه
وشيء يشبه لعدسات النظارات الزقها بعيوني اذا نمت لمدة 5 ايام ويطلع شكلك زي الذبانه ههههه

لما طلعت حسيت بدوخه وسويت وصلت رقص ما انسى هموقف دخت قدام الناس ما طحت بس مسكت الجدار هههه اخوي مات من الضحك على شكلي ما اشوف كان ضباب قووي بعيني لدرجه ما شفت اخوي مع انه يبعد عني 3 امتار بس وشوي شوي يبداء نظري يرجع اهم شيء انه ما ارفع عيوني علشان ما يدخلها اي ضوء ورجعت للبيت ونمت

تكلفة العمليه 8 الاف
ادويه قطررتين وحده منها مرطب ما تتجاوز 40 ريال

اول يومين اقطر كل ساعتين هذي المرحله متعبه لاني ما كنت انام زين
بس الحمد لله ما طولت بس يومين
وبعدها 3 ايام كل 6 ساعات
وبعدها 3 ايام كل 8 ساعات
وبعدها 3 ايام كل 12 ساعه
وبعدها 3 ايام كل 24 ساعه

ممنوع المس عيني لمده 5 ايام
بعد العمليه كنت احس بشيء بعيني كانه رمش بس راح هذا الشعور من ثاني يوم وممنوع اغسل شعري لمده 5 ايام حتى الوضوء بس امسح وجهي بدون ما المس الجفن
اقدر اشوف التلفزيون بعد يوم من العمليه بس انا فضلت ما اشوف اخاف على عيوني وما يعنيلي التلفزيون
احس احيانا بحراره بعيني بس تخف اذا نمت ما شفت ضوء كثير لاني احس بانزعاج من الضوء

بعد العمليه بيوم عندي موعد سويت فحوصات وطلع نظري 6 على 6 الحمد لله ارتحت من العدسات و النظارات
وعطاني موعد ثاني بعدها باسبوعين

على فكره جلست تقريباً اسبوعين بعد العمليه احس صداع براسي لان نظرك رجع بقوه كنت اجلس بظلام بس الحمد لله ما طولت همرحله كثير الحين لي سنه من سويت العمليه وراضيه تماماً عنها وندمانه اني ماسويتها من زمان
ان شاء الله اكون افادتكم تجربتي




هناك 5 تعليقات:

  1. حمد الله على السلامة
    انا سويتها في المغربي في جدة
    بصراحة الحياة فرقت بعد العملية
    أنصحك تشريحي عينك أسبوعين
    زوريني في مدونتي
    http://qatifah.wordpress.com/

    ردحذف
  2. حمدالله على سلامتك <~ مع انها متاخرة -__-
    تصدقين انا ودي اسويها بس خايفه
    ورحت لمستشفى الصالح وقالي اذا صار عمرك 21 سنه <~ وانا حاليا عمري 18 سنه :$
    وحبيت اقولك مشاء الله مدونتك روعة والى الامام
    متابعه لك جديدة :$

    ردحذف
    الردود
    1. ابداً ما تخوف ولا تحسين بشيء ، اسهل من طبيب الاسنان
      انا كنت خايفه ومتوتره بس بعدها ندمت تعبت اعصابي على الفاضي

      حذف
  3. مدونة رائعة , شكرا لمشاركة تجربتك مع اليزك , شجعتيني اعملو على عيني , اتمنى لك التوفيق والنجاح .

    ردحذف